SUID-AFRIKAANSE RADIOLIGA NUUS VIR SONDAG 27 MEI 2018
Goeiemôre en welkom by die weeklikse nuus uitsending van die Suid-Afrikaanse Radioliga, gelees deur ________________________ (jou naam, roepsein en QTH)
Die Suid-Afrikaanse Radioliga saai elke Sondag nuus bulletins in Afrikaans sowel as Engels om 08:15 en 08:30 Sentraal Afrika Tyd onderskeidelik uit op HF sowel as op verskeie BHF- en UHF-herhalers. Hierdie uitsendings word ook via Echolink herlei deur ZS6JPL. 'n Potgooi is ook beskikbaar op die Liga se web tuiste.
‘n Oudio opname sowel as ‘n teks weergawe kan van die Liga se webblad, www.sarl.org.za, afgelaai word en jy kan ook daar inteken om nuwe bulletins per e-pos te ontvang.
Ons begin vanoggend die bulletin met nuus van 'n stil sleutel.
Dit is met leedwese dat daar aangekondig word dat die sleutel van P G Pretorius, ZS6PPE op 14 Mei 2018 stil geword het nadat hy by die Knysna-hospitaal opgeneem is.
Ons betuig ons opregte meegevoel aan Louis, ZS2EN en Louise Jordaan, familie en vriende.
POUSE
In die nuus vandag:
SUID-AFRIKA KRY 100 KHz OP 60 METER
DIE JUNIE RADIO ZS
en
XENIA GENIET 'N TWEEDE, MEER SUKSESVOLLE JAAR AS GASHEER VAN "DAYTON"
Bly ingeskakel vir meer inligting oor hierdie en ander interessante nuusitems.
SUID-AFRIKA KRY 100 KHz OP 60 METER
Op Vrydag 25 Mei het OKOSA die Nasionale Radio Frekwensieplan 2018 gepubliseer waarin amateur radio 100 kHz op 'n gedeelde basis in die 60 meter-band toegeken is en die kanaal 5 290 kHz vir die 5 MHz-voortplantings navorsingsprojek. Die Nasionale Radio Frekwensieplan 2018 is 'n byna 300-bladsy-dokument wat die hele radio frekwensiespektrum dek. Die plan is in Staatskoerant 41650, wat vanaf volgende week vanaf die Staatsdrukker se webwerf onder algemene kennisgewing 266 beskikbaar sal wees. Die SARL sal al die amateur-toekennings sorgvuldig oorweeg en verseker dat 'n band plan in plek is.
Die spektrum van 5 350 tot 5 450 kHz is nou beskikbaar vir alle gelisensieerde radio amateurs op 'n gedeelde nie-steuring basis. Die Raad werk aan die 60 m-band plan deur gebruik te maak van Aanbeveling LA17_C4_REC_02 van die 2017 Streek 1 Algemene Konferensie as basis. Die Raad sal die band plan so gou as moontlik publiseer en dan kan werking op 60 meter begin.
Daarbenewens is die kanaal 5 290 kHz toegeken vir WSPR-bakens wat in die SARL-voortplantings navorsingsprojek ontplooi is en lede kan voortgaan om hierdie frekwensie te gebruik. Weens lisensiërings kwessies het die SARL lae sleutel op die 5 290 kHz baken projek gehou. "Ons kan nou vol stoom gaan," het Hans van die Groenendaal, ZS6AKV, SARL Regulatoriese Bestuurder gesê. "Daar is nie meer beperkings nie en geen aansoek vir die gebruik van die 60-meterband is nodig nie."
SARL president, Nico van Rensburg ZS6QL, het opgemerk dat die SARL al lank aan die 100 kHz-60 meter-toekenning gewerk het, en hy het gesê. "Dit is duidelik dat ons aanhoudende interaksie met OKOSA dividende betaal het. Dit is egter nie die einde van die pad nie, want in die nuwe band plan is krag op 5 MHz beperk tot die WRC-15 ooreenkoms van 15 watt e.i.r.p
Gaan voort om 5 290 vir WSPR te gebruik en wag die aankondiging van die 60 m-band plan voordat jy op die nuwe toekenning begin werk. Bly op hoogte van opdaterings, luister na SARL Nuus en meer inligting as die SARL die plan uitpak.
OPDATERING VAN DIE BHF/UHF REKORDTABEL
Paul Smit, ZS6NK het deur die BHF/UHF Rekordtabel gewerk, opdaterings is gemaak en die dokument is beskikbaar vir aflaai vanaf die Liga-webblad. Daar is 'n afdeling met die titel "Onvolledige Data" en jy word gevra om Paul te help om die ontbrekende inligting in te vul. Jy kan Paul by zssixnk@gmail.com kontak.
DIE JUNIE RADIO ZS
Die Redakteur van Radio ZS wil die Junie 2018-uitgawe in die komende week publiseer, maar sy voorraad artikels het opgedroog! Baie dankie aan die Zululand ARK, Patrick, ZS3PS, Pieter, V51PJ en Richard, ZS6RKE vir die artikels wat hulle gestuur het en aan Karl, ZS1KC vir die fotos wat hy gestuur het.
Het jy 'n artikel of artikels wat in Radio ZS gepubliseer kan word? Hulle kan Engels of Afrikaans wees. Ek weet Redakteurs van Klub Tydskrifte sukkel ook vir materiaal, maar Mnr Redakteur, dalk het jy iets om te deel.
Stuur asseblief jou bydrae in MS Word of OpenOffice met fotos en grafika afsonderlik na radiozs@sarl.org.za. Hou asseblief fotos tot 1 MB.
XENIA GENIET 'N TWEEDE, MEER SUKSESVOLLE JAAR AS GASHEER VAN "DAYTON"
Hamvention® 2018 het vir 'n tweede jaar teruggekeer na die Greene County Skougronde en Eksposentrum in Xenia, Ohio, wat hoë punte vir bywoning verdien, die debuut van baie nuwe Amateur Radio-send/ontvangers en lekker kos.
"Behalwe die reënbui Vrydag en Saterdag, het die geleentheid baie glad verloop," het QST-redakteur Steve Ford, WB8IMY, gesê. "Baie deelnemers, goeie kos en 'n ruim uitleg wat dit maklik gemaak het om rond te beweeg. Dit is 'n baie beter plek as Hara," het hy bygevoeg. Ander wat kommentaar gelewer het op die Hamvention Facebook-bladsy het ooreengekom, hoewel sommige kla dat die snuffelmark gebied te klein was, nog steeds modderig en nie so goed bygewoon soos in die vorige jare, toe die vlooimark Dayton Hamvention was!. Baie het die Dayton Amateurradiovereniging (DARA) geprys om dit 'n uitstekende vertoning te maak terwyl hulle steeds die nodige verbeteringe aanpak.
Jy luister aan ʼn nuus uitsending van die Suid-Afrikaanse Radioliga
HAMVENTION 2018 vervolg
Jong deelnemers was vanjaar in groter getalle, insluitende spanne van studente wat belangstel om Amateur Radio met robotika te kombineer. Byvoorbeeld, die ‘First Robotics’ kompetisie spanne was op hande om hul skeppings te demonstreer. Die Yasme Stigting se geborgde "Ham Radio 2.0 - Innovasie en Discovery" gebied was 'n groot treffer, het die Yasme Stigting se president, Ward Silver, N0AX gesê. "Vakke het gewissel van hoë-bandwydte satelliet ontwerpe tot Pieke op die Lug (SOTA), HamSCI se 2017 Sonsverduistering QSO Geselligheid (SEQP) navorsing en QSLs." Silver het gesê die doel was om verskillende groepe te help om te ontmoet en te kommunikeer. Navorser Nathaniel Frissell, W2NAF, wat die HamSCI-stalletjie beman het, het berig daar was 'n geweldige reaksie.’
Koos Fick, ZR6KF, van Suid-Afrika en Florian Zwingl, OE3FTA, van Oostenryk het die IARU-streek 1-groep Youngsters on the Air (YOTA) verteenwoordig wat YOTA in IARU-streek 2 (die Amerikas) bevorder. Die YOTA-somer kamp sal in Augustus in Suid-Afrika gehou word - wanneer dit winter in die Suidelike Halfrond is.
(Dankie aan die ARRL-brief vir hierdie item)
SOKKER WÊRELD BEKER RADIO MARATHON
Baie spesiale roepseine van lande wat deelneem aan die Wêreldbeker-sokkertoernooi in Rusland, asook van ander FIFA-lidlande wat nie vir die eindronde kwalifiseer het nie, sal tussen 1 Junie en 15 Julie aktief wees. Die roepseine het óf 'FIFA' óf 'FWC' as agtervoegsel. Die lys van roepseine kan gevind word op die voorblad van die Liga-webblad. Volledige inligting sal gepubliseer word op http://fwc18.hamlogs.net/.
WESRAND SNUFFELMARK
Die Wesrand Amateurradioklub bied om 12:00 op Saterdag 2 Junie 2018 hul volgende snuffelmark aan by hul Klubhuis in Krotonstraat, Weltevredenpark in Roodepoort. Almal is welkom. Bring jou surplus en ondersteun die verkoper op die dag. Vir meer inligting, kontak Phillip, ZS6PVT by 083 267 3835.
DIE OTL ARK ALGEMENE JAARVERGADERING
Op 5 Mei 2018 het ZS6OTL sy algemene jaarvergadering gehou. Die volgende lede is vir 2018 as komiteelede verkies.
Voorsitter: De Wet Strydom, ZRSDWS
Sekretaris en Tesourier: Yvonne Jansen van Rensburg, ZS6BSH.
Tegniese Span: Langes du Plessis, ZR6BDZ, Jacques Swanepoel, ZS6WDL en De Wet Strydom, ZRSDWS
RAE en PR: Dawid Jansen van Rensburg, ZS6VS
Veldstasie koördineerder: Anton Keyter, ZS6LAM.
Ons dank aan die komitee van 2017.
Baie geluk aan Anton Keyter, ZS6LAM wat die Icom IC-2300-radio gewen het.
HF VOORTPLANTINGSVOORSPELLING
Hannes Coetzee, ZS6BZP, berig dat die verwagte sonaktiwiteitsvlak laag gaan wees. Tans is daar drie klein, stabiele sonvlekkies sigbaar. Diegene wat hulle eie frekwensievoorspellings wil doen, kan 'n verwagte effektiewe sonvlektelling van een vir die week gebruik. Amateurs kan goeie openinge op die 15 tot 30 m bande verwag. Besoek gerus die webtuiste spaceweather.sansa.org.za vir meer inligting.
Nou die Dagboek van Gebeure vir die volgende paar weke:
2 Junie – die Wesrand Snuffelmark
10 Junie – die Hammies Naelloop en die Comrades Marathon
16 Junie – Jeugdag en die Oos Rand ARK Snuffelmark
17 Junie – Vadersdag en Wêreld QRP Dag
21 tot 25 Junie – die SARL Top Band QSO Geselligheid
Om die bulletin mee af te sluit, ‘n opsomming van ons hoof berig:
Op Vrydag 25 Mei het OKOSA die Nasionale Radio Frekwensieplan 2018 gepubliseer waarin amateur radio 100 kHz op 'n gedeelde basis in die 60 meter-band toegeken is en die kanaal 5 290 kHz vir die 5 MHz-voortplantings navorsingsprojek. Die spektrum van 5 350 tot 5 450 kHz is nou beskikbaar vir alle gelisensieerde radio amateurs op 'n gedeelde nie-steuring basis. Die Raad werk aan die 60 m-band plan deur gebruik te maak van Aanbeveling LA17_C4_REC_02 van die 2017 Streek 1 Algemene Konferensie as basis. Die Raad sal die band plan so gou as moontlik publiseer en dan kan werking op 60 meter begin.
Daarbenewens is die kanaal 5 290 kHz toegeken vir WSPR-bakens wat in die SARL-voortplantings navorsingsprojek ontplooi is en lede kan voortgaan om hierdie frekwensie te gebruik.
Dit bring ons aan die einde van hierdie bulletin.
Die Suid-Afrikaanse Radioliga se nuusdiens nooi klubs en individue uit om nuus brokkies van belang vir radio amateurs en kortgolf luisteraars in te dien. Plaas nuus berigte indien moontlik, in beide Engels en Afrikaans op die Suid-Afrikaanse Radioliga webtuiste onder die 'news inbox' skakel nie later as die Donderdag wat die bulletin datum voorafgaan nie.
Luister elke Sondagoggend om 10:00 Sentraal Afrika Tyd na "Amateur Radio Today". Daar is herleiding op 7 082 kHz laer syband, 7 205 en 17 660 kHz AM en verskeie herleidings op BHF en UHF frekwensies regoor Suid-Afrika. 'n Potgooi deur Dick, ZS6RO, is ook beskikbaar. 'n Heruitsending vind op Maandae om 18:30 Sentraal Afrika Tyd op 3 230 kHz plaas.
Ons ontvang graag jou seinrapporte, kommentaar en voorstelle, stuur 'n e-pos aan artoday@sarl.org.za. Sentech borg die uitsendings op die nie-amateur frekwensies.
Jy het geluister na 'n nuusuitsending van die Suid-Afrikaanse Radioliga, saamgestel deur Dennis Green, ZS4BS, geredigeer deur Johan de Bruin, ZS6JHB, en gelees deur ...........................................................
Die Afrikaanse Nuusspan groet nou en wens jou n mooi week toe. Totsiens.
/EX
